કે લાગી મારે નટવરથી લગની

કે લાગી મારે નટવરથી લગની, કે મરજાદા મેલી જગની રે;

કે એક જ ટેક અંતર ધારી, કે સગાં કુટુંબ સહુ વિસારી,

કે મને કમેં વરિયા મેરારિ. લાગી૦

કે કર્યું મેં તો તન ધન કુરબાણી, કે હરિ વિના ન વદું અન્ય વાણી;

કે કાનકુંવરથી અટકાણી રે. લાગી૦

કે સુખ મેં તો સંસારી છોડ્યું, કે સઉ સાથે સગપણુ તોડ્યું;

કે જગના જીવન સાથે જોડ્યું રે. લાગી૦

કે મેણાં જગ કેરાં સહીને, કે થિર મન મતવાલી થઈને;

કે ચાલી હું તો શિર કરમાં લઈને રે. લાગી૦

કે બેઠી હું તો ભય જગતને ખોઈને, કે મન નિશદિન રહ્યું છે મોહીને;

કે ‘બ્રહ્માનંદ’નો વાલો જોઈને રે. લાગી૦

Ke lagi mare natavarthi lagani