કર્મ તણા ફળમાં શું અટકયો

કર્મ તણા ફળમાં શું અટકયો, અંતે છે દુઃખદાઈ રે;

બ્રહ્મ વિચાર નિમિષભર કરતાં, તે ફળ સે'જ સુહાઈ રે.

પ્રાપ્ત થવાનું જે ફળ ધારે, અડસઠ તીરથ નાઈ રે;

ક્ષણભર આત્મવિચાર તણું ફળ, સહસ્ત્રગણું સુખદાઈ રે. – કર્મ તણા૦

પૃથ્વીદાન થકી વધતું ફળ, તત્ત્વવિચારનું ભાઈ રે;

ગીતામાં પણ કહી ગયા છે, શ્રીપતિ મુખથી ગાઈ રે. – કર્મ તણા૦

અશ્વમેધ શત યજ્ઞ કર્યેથી, સ્વર્ગલોકમાં જાઈ રે;

ક્ષીણે પુણ્યે મૃત્યુલોકે, પાછો ત્યાંનો ત્યાંઈ રે. – કર્મ તણા૦

આત્મવિચાર ઘડીભર કરવા, મનની કરી સ્થિરતાઈ રે;

તે ફળથી તુજ પિતૃ ઉદ્ધરશે, સ્વર્ગલોકની માહીં રે. – કર્મ તણા૦

વેદ વચન ગુરુમુખે સુણીને, ધારે અંતરમાહીં રે;

વિશ્વનાથ ગુરુ પ્રસાદ ‘ડોસા’, અનહદ કીન કમાઈ રે. – કર્મ તણા૦

Karm Tana Falama shu atakyo