જે કોઈ સદ્ગુરુ શરણે જાય

જે કોઈ સદ્ગુરુ શરણે જાય, તેના સંશય દૂર પળાય.

કામ ક્રોધ મદ મોહ મત્સર, આશા તૃષ્ણા લય થાય;

અતિશયિતાદિક રોષ વિષયના, ઉરમાં નવ દેખાય. – જે૦

તેથી દ્રઢ વૈરાગ ઉપજે, સત્યાનૃત્ય જણાય;

શમ દમ ઉપરતિ સહન શક્તિથી, દૃઢ વિશ્વાસ બંધાય. – જે૦

સમાધાન સ્વરૂપમાં જાણી, ઈચ્છા અતિશય થાય;

વાક્ય વિચાર નિરંતર કરતાં, બ્રહ્મરૂપ દરશાય. – જે૦

અજ્ઞપણું તત્કાળ આળસે, નિત્યાનંદ જણાય;

માયિક ભેદ બુદ્ધિ મેલીને, નિજપદમાંહે સમાય. – જે૦

સમરસ વ્યાપક સચ્ચિદઆનંદ, રૂ૫ થઈ વિલસાય;

‘મનોહર’ મરણ તણો ભય ભાગે, જીવનમુક્ત કહેવાય. – જે૦

Je koi sadaguru sharne jay