જમો જમો જગતના નાથ

જમો જમો જગતના નાથ

જમો જમો જગતના નાથ, કહું કરજોડી;

મારી આતમના આધાર, શરણ મેં તોરી. જમો૦

ગેવર ગુંદવડા દૂધપાક, જલેબી રૂડી;

માંય સાકરબુરાં સાર પેંડા ને પૂરી. જમો૦

જમો મગદળ મેતીચૂર, અને વળી ખાજાં;

માંય મીસરી માખણ દૂધ, ગોરસ છે તાજાં. જમો૦

જમો દાળ ભાત ઘૃતધાર, ગંગાજળ ઝારી;

જસોદાના જીવન કાન, ગોકુળના દાણી. જમો૦

મુખવાસ છે બીડલાં પાન, સોપારી સારી;

તમે રાધાજીના કંથ, ગોકુળ વનમાળી. જમો૦

પ્રભુ જગત જન પ્રતિપાળ, પૂરણ ભગવાના;

મુજ રંક ઉપર દિનરાત, કૃપા કર કાના. જમો૦

ગાએ ‘કૃષ્ણદાસ’ કરજોડ, અરજ ઉર ધરજો;

પ્રભુ અંતકાળ મહારાજ, સ્હાય ઝટ કરજો. જમો૦

Jamo jagat na nath