ભગતી તો ભાવ વિના નહીં આવે

ભગતી તો ભાવ વિના નહીં આવે રે,

ગુરુગમ ક્યૂં પાવે રે...

પ્રથમ હરિ ગુરુ સંત ન સેવ્યા,

મરને અનેક વાતું બનાવે,

ગુરુગમ જ્ઞાન શબ્દ સુધી ના’વે,

મરને પ્રેમ મગન થઈ ગાવો રે... ગુરુગમ૦

ચળેલ પુરુષનાં સ્વપ્નામાં ના આવે,

મરને પાટે જોત્યું જલાવે,

મનના મેલા ને અંતરના ભીના,

ઈ તો પીર થઈને પૂજાવે... ગુરુગમ૦

એણે સતગુરુ શું સમજાવે,

મેલી મરજાદા ચાલે ઊભેલા,

ઈ તો ભીતુંમાં ભટકાવે રે... ગુરુગમ૦

કગવાની સંગાથે કબુદ્ધિ આવે,

સાન સંતો કેરી ના’વે,

‘દાસ હોથી’ કે’ જેણે સંત ન સેવ્યા,

ઈ તો નિશ્ચે ચોરાશીમાં જાવે રે... ગુરુગમ૦

bhagati to bhav vina nahi aave