હાં રે તમે નુરત સુરતથી રે દેખો

હાં રે તમે નુરત સુરતથી રે દેખો, કોઈ દેહીડી નગરની માંઈ,

વાંસલડી વાગે છે કે નાંઈ, શબ્દ ધૂન લાગે છે કે નાંઈ.

હાંરે તમે કોટિ કરોને ઉપાય, તબ આત્મ સમાધિ થીર થાઈ,

ગુરુજી મળ્યા છે રે ઘટડાની માંઈ, સુરતા શૂન્યમાં રહી સમાઈ... હાંરે૦

હાંરે તમે કાં રે ભટકો છો ભાઈ, જુવો આપ શરીરમાં જાઈ,

બ્રહ્માંડ ભર્યું છે ભૃકુટિની માંઈ, સબ ઘટમાં રહ્યો સમાઈ... હાંરે૦

હાં રે ગુણ ગુણથી નવ ગણાઈ, એથી અલખ પુરુષ ઓળખાઈ,

નૂરીજન નૂરમાં રહ્યો સમાઈ, મદમસ્ત બન્યો મન માંઈ... હાંરે૦

હાંરે જોતજોતાંમાં જુગ જાઈ, કરી લે અંતર ઘટમાં ઉપાઈ,

હાંરે ભટક મા ભવસાગરની માંઈ, મનુષ્ય દેહ દેવને દુર્લભ ભાઈ... હાંરે૦

હાં રે સત શબ્દમાં રહે સમાઈ, એવા ‘દાસ અમર’ ઘટ માંઈ,

ગુરુ આનંદ મળ્યા મુંને ભાઈ, જબ જ્યોતમાં જ્યોત મિલાઈ... હાંરે૦

han re tame nurat suratthi re dekho