રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ઝવેરચંદ મેઘાણી
[ભજન]
ગરજ હોય તો આવ ગોતવા,
હું શીદ આવું હાથ, હરિ!
ખોજ મને જો હોય ખેવના
હું શીદ સ્હેલ ઝલાઉં, હરિ! -ગરજ.
ગેબ તણી સંતાકૂકડીમાં
દાવ તમારે શિર, હરિ!
કાળાન્તરથી દોડી રહ્યા છો
તોય ન ફાવ્યા કેમ, હરિ! -ગરજ.
સૂફીઓ ને સખી-ભક્તો ભૂલ્યા.
વલવલિયા સહુ વ્યર્થ, હરિ!
‘સનમ! સનમ!’ કહીને કો રઝળ્યા,
કોઈ ‘પિયુ! પિયુ!’સાદ કરી. -ગરજ.
પોતાને પતિતો દુષ્ટો કહી
અપમાને નિજ જાત, હરિ!
એ માંહેનો મને ન માનીશ,
હું સમવડ રમનાર, હરિ! -ગરજ.
તલસાટો મુજ અંતર કેરા
દાખવું તો મને ધિક્, હરિ!
પતો ન મારો તને બતાવું
હું-તું છો નજદીક, હરિ! -ગરજ
મારે કાજે તુજ તલસાટો
હવે અજાણ્યા નથી, હરિ!
હું રિસાયલને તું મનવે
વિધવિધ રીતે મથી, હરિ! -ગરજ.
પવન બની તું મારે દ્વારે
મધરાતે ઘૂમરાય, હરિ!
મેઘ બનીને મધરો મધરો
ગાણાં મારાં ગાય, હરિ! -ગરજ.
વૈશાખી બળબળતાં વનમાં
દીઠા ડાળેડાળ ભરી
લાલ હીંગોળી આંગળિયાળા
તારા હાથ હજાર, હરિ! -ગરજ.
માછલડું બનીને તેં મુજને
ખોળ્યો પ્રલયની માંય, હરિ!
હું બન્યો કાદવ,તું બની ડુક્કર
રગદોળાયો, શરમ, હરિ! -ગરજ.
પથ્થર લક્કડ પશુ પંખી થૈ
નજર તમારી ચુકાવી, હરિ!
માનવ થઈ પડું હાથ હવે, તો
જગ કહેશે, ગયો ફાવી, હરિ! -ગરજ.
લખ ચૉરાશીને ચકરાવે
ભમી ભમી ઢૂંઢણહાર, હરિ!
ડાહ્યો થૈ કાં દાવ પૂરો દે,
કાં તો હાર સ્વીકાર, હરિ! -ગરજ.
સ્રોત
- પુસ્તક : સોના નાવડી (પૃષ્ઠ ક્રમાંક 376)
- સંપાદક : જયંત મેઘાણી
- પ્રકાશક : ગુજરાત સાહિત્ય અકાદમી
- વર્ષ : 1997