એ ભલો ભલો મેવાડનો રાજા રાણો કુંભોજી;

કુંભાને સરીખાં રે હરિજન અમને હેતે મળો રે જી.

ઓત્રા ખંડમાંથી ચારણ આવ્યો રે હાં;

અને આવ્યો આવ્યો કુંભા તારા મોલ રે. એ૦

રૂપું માગો તો ગઢવી સોનું આપું રે હાં;

અને આલુબાલુ મરથ ને ભંડાર રે. એ૦

સોનું રૂપું મારે અંત ઘણેરું રે હાં;

માગું કુંભા તારી રાણીને. એ૦

અસત બોલું તો મારું સત હારું રે હાં;

અને સૂના સૂના મોલ તમારા રે. એ૦

સાંજ પડી સતીએ દીવડિયા રચાવ્યા રે હાં;

અને મોલે આ ગઢવી ચારણ રે. એ૦

હરતાં ફરતાં ગઢવી વેણલાં વાયા રે હાં;

અને જ્યાં રે જુવે ત્યાં કુંભો રાણો રે. એ૦

સવાર પડીને ચોરે ચારણ આવ્યો રે હાં;

અને સૂતો માલાને જગાડ્યો રે. એ૦

કર જોડી ગઢવી પાય લાગ્યો રે હાં;

અને સાચું સાચું ધરમ તમારું રે. એ૦

માલદેની કુંવરી સતી ‘લીલાવતી’ બોલ્યા રે હાં;

અને મારા હરિજનો અમરાપુરમાં વાસ રે. એ૦