અલ્યા ભૂલ મા ભૂલ મા, ભક્તિ ભૂધર તણી

અલ્યા ભૂલ મા ભૂલ મા, ભક્તિ ભૂધર તણી, કારમી માયા જોઈ કાં રે હરખો;

સ્વપ્નની વાર્તામાં, શું રે રાચી રહ્યો, પ્રેમ દૃષ્ટે કરી હરિને નરખો. - અ૦

શાને તેં દેહ ધરી, સમરને શ્રી હરિ, આવ્યો સંસારમાં શું રે કરવા;

માયાની જાળમાં, મોહ પામી રહ્યો, અવનિ પર અવતર્યો ભાર ભરવા. - અ૦

ભક્તિ કારણ જોને, ભૂધરે દેહ ધરી, ભાવે ભરવાડની છાશ પીધી;

શંકર ઉગારીને, ભસ્માંગદ મારિયો, આપી કૈલાસ ઉમિયા રે દીધી. - અ૦

લોકની લાજ, મરજાદ તે પરહરો, નિરભે થઈને હરિગુણ ગાવો;

મનના મનોરથ પૂરશે માવજી, તજી સંસાર વૈકુંઠ જાવો. - અ૦

દેહ દમન ષટ્ કર્મથી વેગળો, સાધનવાળો જો જગ્ન જાગે;

‘નરસૈયા’ચા સ્વામી, સબળ વશ ભક્તિને, અવર ઉપાય નહીં દેહ તાગે. – અ૦

Alya bhul ma bhul ma bhakti bhudhar tani