અલખ નામ સાચું રે

અલખ નામ સાચું રે

અલખ નામ સાચું રે, ભાઈ આ ભવમાં;

રાગી બની રાચું રે, કાચું હૈયું તું કર મા.

આભમાંહી જ્યમ અબ્રની છાયા, મારુત વાતાં વિખરાય,

તેમ પાયા વિનાની કાયા એવી, જલદી વણસી જાય;

ભરોસો જરી તેનો રે, ધીરો બની તું ધર મા. અલખ૦

કામાદિક જે શત્રુ મોટા, પૂંઠે લાગ્યા છે જાણ,

ગાફલ થતાં ગમાર તુજને, કરશે મોટી હાણ;

માટે ચેતી ચાલો રે, પડતા શાને છો દવામાં? અલખ૦

સગાં સહોદર કટુંબ કબીલો, છે માયાની જાળ,

મારું મારું કર મા મૂરખ, છે સહુ આળપંપાળ;

પ્રીતે પ્રભુ ભજવો રે, ફસાવું નહીં કો’ ફંદમાં. અલખ૦

જયશંકરતન ગવરી કેરાં, સાંભળીને ઉદ્દગાર,

રટો નિરંતર નામ નિરંજન, જે છે મોક્ષનું દ્વાર;

નીતિ રીતિ ધરતા રે, જાશો નહીં જમપુરમાં. અલખ૦

Alakh naam sachu re