એક રંક સપનામાં રાજા થયો રે

એક રંક સપનામાં રાજા થયો રે,

કરે ભૂપ ભિખારીનું કામ,

સહુ કૌતકની વાત એક સાંભળે રે.

જે જાગે તેને જૂઠું પડે રે,

ઊંઘે તેના હૈયામાં હામ. સહુ૦

અરસપરસ વરતે એકએકમાં રે,

જુએ સાચું ન કોઈ જણાય. સહુ૦

છે જૂઠું ને સાચું જાણિયું રે,

એ તો ડાહ્યા કે ગાંડા ગણાય? સહુ૦

નર કહે છે આ નારી માહરી રે,

નારી કહે છે આ મારે નાથ. સહુ૦

પતિ મૂકીને ચાલે પ્રેમદા રે,

નરે છોડ્યો તે સુંદરીને સાથે. સહુ૦

બાજીગરે આ ખેલ બનાવિયો રે,

જાણે કોઈક સંત સુજાણ. સહુ૦

કળા કોઈ ન જાણે કિરતારની રે,

કરે વહાલાને વેદ વખાણ. સહુ૦

સાચું જૂઠું છે સુખ સંસારનું રે,

તેમાં કરો કલ્યાણનુ કામ. સહુ૦

ભવસિંધુ તરો ભક્તિ વડે રે,

ગુરુ ગાય તે ‘ગણપતરામ’. સહુ૦

Aek rank sapnama raja thayo re