રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

ભે ભાગી

ભે ભાગી

વૃત્તિ મારી સંતચરણમાં લાગી રે,

સુરતા મારી સાધુ ચરણમાં લાગી રે;

તેણે મારી ભે ભાગી ભે ભાગી.

સતગુરુએ મને શબદ સુણાવ્યો,

રણંકાર રઢ લાગી;

તખત ત્રિવેણીના તીર ઉપર,

મોહન મોરલી વાગી રે... તેણે મારી૦

ઘણા દિવસ મન મસ્તાનું ફરતું,

દિલડે ન જોયું જાગી;

પુરુષ મળ્યા મને અખર અજિતા,

ત્યારે સુરતા સૂનમાં લાગી રે... તેણે મારી૦

દયા કરીને મન ડોલતું રાખ્યું,

તૃષ્ણા મેલાવી ત્યાગી;

સતગુરુ આગળ શિષ નમાવ્યું,

ત્યારે બાવડી પકડી આગી રે... તેણે મારી૦

સતગુરુએ મને કરુણા કીધી,

અંતર પ્રેમ પ્રકાશી;

'દાસ હોથી'ને ગુરુ મોરાર મળિયા,

ત્યારે તૂટી જનમ કેરી ફાંસી રે... તેણે મારી૦

સ્રોત

પુસ્તક : સોરઠી સંતવાણી (પૃષ્ઠ ક્રમાંક 107)
સંપાદક : ઝવેરચંદ મેઘાણી
પ્રકાશક : ગૂર્જર સાહિત્ય ભવન
વર્ષ : 2017
આવૃત્તિ : (પુનર્મુદ્રણ)