આ ઘડીએ

આ ઘડીએ

એકલડાના બેલી,

રામાપીર, વા’રું કરજો વે’લી રે,

આ ઘડીએ જી.

કાયા નગરીને કાચો કોટ,

એમાં જમડે મારી દોટ,

જીવડાને લેવા ચાલી ચોટ રે,

આ ઘડીએ જી... એકલડા૦

મન, તું મેવાડો થા,

ગઢ રુણેજામાં જા,

સૂતા પીર રામદેને જગાડો રે,

આ ઘડીએ જી... એકલડા૦

પીર, લીલો ઘોડો છોડ,

વણ પલાણે ધરોડ,

સાથે લેજો વીરમદેની જોડ રે,

આ ઘડીએ જી... એકલડા૦

પીરે ઘોડો છોડ્યો ઝટ,

ઠેકાડ્યો રુણેજાનો કોટ,

જમડાને મારી દીધો ઠોંક રે,

આ ઘડીએ જી... એકલડા૦

પીરે ભાલા મર્યા ભમ્મ,

જમડાનો કાઢી નાખ્યો દમ,

હવે મારો તો વીરમદેના સમ રે,

આ ઘડીએ જી... એકલડા૦

જમદૂત ભાગ્યા જાય,

એણે વળી ક્યે છે ધરમરાય,

ઈ ઘેર જાજો મા, મારા ભાઈ રે,

આ ઘડીએ જી... એકલડા૦

‘સામત બારોટે’ ગાયો,

રામદાસે સુધાર્યો,

મે’મા મારા વાલાજીનો વધાર્યો,

આ ઘડીએ જી... એકલડા૦

એકલડાના બેલી,

રામાપીર, વા’રું કરજો વે’લી રે,

આ ઘડીએ જી.

Aa ghadie